أخاف مواجه خوفي

إتصلت فيني انسانة جداً احبها واحب وعيها وثقافتها ، وطول فترة كورونا كانت مشغولة بتطوير نفسها ، اتصلت علي واخذت المكالمة مدة طويلة على غير العادة وانتقلنا من حديث الى حديث مادري شلون خدعتني وخلتني اتكلم بموضوع مازلت ما طرحته بالسوشيال ميديا ، عرفت من داخلي انها محتاجة للاجابة على سؤال يدور في راسها، قلت لها قوليلي بشكل مباشر لا تلفين وتدورين، سمعت صوتها تبچي نطرتها تهدى، لاني من الشخصيات اللي احترم جداً حزن احد او دموعه وابداً ما احب احد يوقف فجأة لأن التفريغ مهم، قالت لي اخاف! سألتها من شنو تخافين؟ ما جاوبت، عرفت ان الموضوع وايد أعمق، حاولت بطريقة معينة اخليها تتكلم لين وصلت لجذور الموضوع، رغم كل قوتها ووعيها وثقافتها إلا إنها عندها مشكلة داخلية مو قادرة تواجهها ولا تتقبلها ولا تحلها، قالت إن سبب طلاقها إن أول ولد لها كان معاق فقرر زوجها يخيرها بينه وبين الطفل فاختارت الطفل وطلقها، عاش الولد لي عمر معين وتوفى، اللي سوته انها طلعت نفسها من الحدث بسرعة وضغطت على روحها بالطلعات وقراءة الكتب و دورات تنمية وكملت دراستها ،لكنها تحس ان الموقفين مازالو يألمونها رغم مرور سنوات، وما عرفت اذا كان قرارها صح او غلط، قلت لها أكبر غلط نرتكبه بحق نفسنا ان ما نحترم حزنا ، ما ناخذ وقت ان يطلع ، ما نعطيه وقته اللي يبيه، مو معناه اني اعيش بكآبة لا ، لكن ما اتهرب منه اللي سويتيه هروب علشان ما تقعدين مع نفسج وتسمعين صوتج ، بدل ما تواجهينه بداخلج وتطردينه هربتي منه فصار يلاحقج وبتم يلاحقج ويعيد لج الذكرى لين تحترمينه ! قالت شلون احترم الحزن؟ قلت لها تقبلي وجوده تقبلي نفسج سامحي نفسج سامحي الاشخاص اللي بالموقف وقفي تأنيب الضمير وقفي الافكار السلبية اللي تدور بداخلج ، عدم مواجته اهي مقاومة انتي ما تعلمتي الدرس ، تعلمي مهارات تخلصج من جذور الموقف والمشاعر نفسها، مثل التنفس، تقنية الحرية النفسية، التأملات، الكتابة وكثير من الطرق المنتشرة.

اللي بوصله ان مهم جداً نحترم مشاعرنا مهما كانت مو بس نحترم الناس ومشاعرهم، ومهم نتعلم مهارات تساعدنا نتخلص من اي شي ما نحبه بداخلنا .