انتهت القصة

في البداية بحذرك من قراءة المعلومات، اذا تحس انها ما تناسبك لا تكملها ومو ضروري تقتنع فيها، اعتبرها معلومة عابرة يمكن بيوم تناسبك..

اذا شخص كانت حياته معفوسة مو عاجبته ولا قادر يحقق اللي يبيه وقرر عقبها انه يتغير ويتطور، دخل دورات قرا كتب حضر استشارات واشتغل على نفسه ، اول تحدي بواجهه ان اللي حوله والناس اللي تعرفه بتستغرب من تغيره وممكن ترفضه وممكن تحاول ترده الشخص اللي كانو يعرفونه لانهم رافضين فكرة تغييره، في ناس تطيح بأول تحدي وتستسلم، وفي ناس تقرر تكمل، لمن تكمل تبدي أموره تمشي وتضبط ويحقق اللي يبيه ، بس في فئة معينة على كثر ما يطبقون ويمشون صح وتلاقيهم فعلاً تغيرو، لكن ما يضبط معاهم شي! يستغربون ويحاولون لكن ما تعدل؟ يلاقونهم نفسهم بتحديات أصعب وأكبر ويتحبطون! ليش يصير لنا جذي؟ فلان وفلانه ما يسوون ربع اللي اسويه وامورهم تمام ليش انا لا؟!

طبعاً في منهم يوصلون مرحلة الهوس والشك ومهما يسألون مختصين ماكو إجابة شافية لهم ولا واضحة ولا منطقية،، على فكرة أنا وحدة منهم 🙂 .. ووايد كلام يقولونه المختصين ( اللي حافظين ومو فاهمين) ما يتناسب مع الشخص المتحبط من وضعه ومستغرب ولا لاقي اجابة ..

بعد محاولاتي الكثيرة ، فهمت الإجابة واللي يرفض وايد ناس يقولها او يشرحها او حتى يعرفها، فبحاول ابسطها لكم ومن غير احكام، في ناس الله مختارهم لرسالة مختلفة في الدنيا مالها علاقة بالأهداف المادية، شي وايد أكبر و أعمق ويحاول يوجهم لطريج ثاني بس اهم مصممين يمشون الطريج المادي واللي تبرمجو عليها من المجتمع والدورات والمدربين للأسف، حتى المختصين اللي علمونا لا تتبرمج من المجتمع صارو اهما أكبر مبرمجين :).

الحقيقة: ان الشخص اللي يسأل التغيير ، فبمعنى يطلق أسئلة يومية ونوايا وعارف شقاعد يسوي، فعلياً بدء التغيير لكن في شغلة مهمة واااايد ، شلون تبي توصل لاهداف وانت تغيرت افكارك وقناعاتك ومصمم تعيش بنفس النسخة القديمة اللي كانت معاك مبرمجة شلون؟!

ما يصير انت تطلب للتغيير وبنفس الوقت تعيش بقصة قديمة بأطباع قديمة بتصرفات قديمة !!! تخيل ان هالشي ممكن يعيقك وما يخليك توصل!! تخيل ان حتى اهدافك تتغير مع تغييرك ؟!

اي ،، ما علمونا جذي خلونا نصر على برمجة معينه واهداف ونطالع لوحة قديمة لنسخة قديمة ما تشبهنا اليوم، طبعاً التغيير سواء ايجابي والا سلبي..

لمن تتغير وتتطور ويرتقي وعيك، اول شي تسويه وتعرفه ان قصتك القدبمة انتهت، نسختك القديمة ماتت، انت شخص مختلف ما يصير تعيش بشخصيتين متناقضتين وتخليهم يتصارعون تحس انكم في حاله فصام مع ذاتك ✌🏻..

كل تجربة مرت، كل درس تعلمت منه، كل موقف، ذكرى، هدف وعلاقات وغيره، كانت مناسبة لمرحلة من حياتك بنسختك القديمة، الحين انت شخص مختلف فتعامل معاها على هالأساس، ولا تلوم نفسك وتحاسبها على التقصير هذا اللي كانت تعرفه بوقته بس عقب ما قريت هالمقال المفروض ان الصورة صارت واضحة😉